北京治疗白癜风好处有哪些 http://m.39.net/disease/a_5636619.html上篇：长篇故事传本，花姑娘系列六《花姑娘遇台商》(作者：余乃立)
花姑娘系列七
《花姑娘遇亲家》
（五句板）
作词：余乃立
年5月8日
山歌一喳接一喳
花姑系列接等下
前集来讲廖胖发
今讲花姑遇亲家
慢慢听涯讲春车
慢慢听涯讲春车
且说有只赖齐加
佢系有良生身父
有人喊佢大懒蛇
喊来喊去烂糍粑
喊来喊去烂糍粑
抵只齐加人品差
生到赖子走呀碧
离开老婆离开家
单走麦城攀枝花
单走麦城攀枝花
抵只地方系唔差
佢在祖国四川省
物产丰富顶呱呱
人来人往好繁华
人来人往好繁华
且说抵只大懒蛇
来到此处闯世界
过冇几久苦喳喳
带来盘缠唔够花
带来盘缠唔够花
抵下难到烂糍粑
举目无亲冇依靠
流浪街头屋檐下
肚屎冇吃空些些
肚屎冇吃空些些
心肝慓上又慓下
饿去肚屎顶唔得
头重脚轻眼昏花
亲家且姆都搞差
亲家且姆都搞差
唔知老婆还系爸
人家话佢真四六
神经病来大傻瓜
自寻死路害自家
自寻死路害自家
你看抵只烂糍粑
想转屋卡冇路费
盲够孟上又孟下
冇钱样般转屋夸
冇钱样般转屋夸
后悔正知差了差
早知今日咁冤枉
丢妻弃子唔着华
做人衰*害自家
做人衰*害自家
如今好比井中蛙
茫茫人海何处去
那里能有涯个家
目汁四流泪分花
目汁四流泪分花
街头行上又行下
无奈只好捡废品
艰难度日养自家
时间不觉几年下
时间不觉几年下
穷困潦倒环境差
有日无意看报纸
看到老婆顶呱呱
私人办学口碑佳
私人办学口碑佳
抵下乐坏烂糍粑
心里就来打主意
转去弄点钱来花
总系冇钱样转家
总系冇钱样转家
落水蓑衣带笠麻
只因平时唔刻苦
今冇分文苦嗟嗟
争点盘缠来回家
争点盘缠来回家
主意打定兴车车
过冇吉久有路费
买好车票搭上车
总算离开攀枝花
总算离开攀枝花
一路欢喜心肝下
坐到车来唔转屋
走到深圳就落车
来寻老婆孩子妈
来寻老婆孩子妈
有日总算运气佳
问到老婆龙岗住
抵下乐坏烂糍粑
能见自家妇人家
能见自家妇人家
来到学校就嘅呱
老婆老婆叫得响
秀嫦听到蒙喳喳
心肝慓上又慓下
心肝慓上又慓下
忙出门口看春车
秀嫦唔看还过得
一看心肝跌呀下
负心之人在楼下
负心之人在楼下
秀嫦看到唔管他
愐到往事肚火起
冇情冇义*如蛇
唔再交往正冇差
唔再交往正冇差
秀嫦就来话糍粑
两人今断情和义
形同陌路各一家
莫恋杨梅暗开花
莫恋杨梅暗开花
抵下急坏烂糍粑
佢同秀嫦来讨歉
千差万差老公差
今日到头害自家
今日到头害自家
以后涯会来改邪
立志做人守本份
痛改前非唔撒野
学乖学好正冇差
学乖学好正冇差
秀嫦就话烂糍粑
爱涯重好冇办法
涯今也有自己家
两人缘分莫再惹
两人缘分莫再惹
你看抵只烂糍粑
听到秀嫦咁样讲
怒发冲冠恶擎擎
狐狸总算露尾巴
狐狸总算露尾巴
滋粑就来把话拉
合唔合来冇打紧
你爱拿钱畀涯花
不然赖子带回家
不然赖子带回家
涯会带转自家划
卖佢三头几十万
涯也唔愁冇钱花
逍遥快活紧春车
逍遥快活紧春车
秀嫦听到骂糍粑
涯个赖子你冇份
你莫讲去兴嗲嗲
赖子同你冇上下
赖子同涯冇上下
你今讲到差了差
赖子一人有一半
你也唔使恶擎擎
法律多少涯懂些
法律多少涯懂些
你系阿妈涯系爸
赖子一半涯畀定
由你上节还系下
爱上爱下自家划
爱上爱下自家划
气得秀嫦骂糍粑
人家虎恶唔吃子
你个心肝*如蛇
歪心臭屎一扛车
歪心臭屎一扛车
花姑送子学堂下
有良见母心欢喜
左声娘来右声妈
蹦蹦跳跳兴嗲嗲
蹦蹦跳跳兴嗲嗲
抵下乐坏烂糍粑
踏破铁鞋寻觅处
盲知赖子眠皮下
眉清目秀相貌佳
眉清目秀相貌佳
糍粑看到乐开花
尽话有良系涯子
涯系你个生身爷
快快过来喊阿爸
快快过来喊阿爸
有良听到蒙喳喳
以为糍粑系癫*
四六货来唔春车
白日做梦人搞差
白日做梦人搞差
你看抵只.烂糍粑
尽话涯系你生父
阿爸无奈离开家
赖子你爱喊阿爸
赖子你爱喊阿爸
花姑听到话糍粑
赖子你冇买乳粉
大哩就话喊阿爸
看你有冇来搞差
话涯有冇来搞差
糍粑听到恶擎擎
佢话花姑系多事
赖子同你冇上下
好管闲事四六嫲
好管闲事四六嘛
花姑向佢讲春车
你个赖子有涯份
细细抱养到涯家
缴佢读书学堂下
缴佢读书学堂下
有良成绩唔晓差
勤奋学习成绩好
考试经常头名拿
大家话佢顶呱呱
大家话佢顶呱呱
糍粑听到兴车车
赖子读书咁识得
遗传基因像阿爸
莫话涯今来自夸
莫话涯今来自夸
花姑听到笑脱牙
尽话糍粑二百五
还敢王婆来卖瓜
*都知你大懒蛇
*都知你大懒蛇
样样你都十分差
沙坝老蟹冇胶料
你系穿笃烂笠麻
屙痢屙肚大傻瓜
屙痢屙肚大傻瓜
糍粑听到就撒野
赖子你话你有份
抱养费用你爱拿
拿点纸币畀涯花
拿点纸币畀涯花
熟轻熟重自家划
冇油脱锅做唔得
十头八万你爱拿
拿哩涯就好上下
拿哩你就好上下
花姑就来骂糍粑
爱涯出钱你莫想
你莫以为涯好惹
你个算盘莫打差
话涯算盘莫打差
你呀唔使大炮车
到时莫话涯咁恶
涯个赖子带转家
涯会卖点钱来花
你会卖点钱来花
花姑就来话糍粑
赖子虽然你有份
你呀唔使恶擎擎
一切事情好上下
一切事情好上下
糍粑听到把话拉
讲到合理涯接受
唔好胡弄涯糍粑
涯个性格唔好惹
涯个性格唔好惹
花姑就话烂糍粑
赖子事情莫争执
你要好好来改邪
莫来再做大懒蛇
莫来再做大懒蛇
糍粑听到也知差
只因自家唔受苦
爱吃懒做害自家
日子过得干巴巴
日子过得干巴巴
花姑就来主意拉
你帮涯来做豆腐
工资照付钱照拿
包吃包住由你划
包吃包住由涯划
糍粑听到兴嗲嗲
既然花姑讲咁好
从此唔做大懒蛇
痛改前非来改邪
痛改前非来改邪
秀嫦听到话糍粑
浪子回头金不换
学乖学好靠自家
立志做人正冇差
立志做人正冇差
糍粑从此来改邪
每日吃哩做豆腐
勤劳打工花姑家
深受花姑来赞夸
深受花姑来赞夸
大家表扬赖齐加
对佢刮目来相看
都话糍粑唔会差
唔再喊佢烂糍粑
唔再喊佢烂糍粑
如今糍粑改了邪
好得花姑来引导
浪子悬崖能立马
赖子也会认阿爸
赖子也会认阿爸
有良成绩跨骏马
日后读书有出息
当只民营企业家
回馈社会戴红花
回馈社会戴红花
大家对佢来赞夸
人人都话有良好
花姑秀嫦功劳佳
都话两人顶呱呱
都话两人顶呱呱
花姑系列今刹车
借得花姑佢缩影
展现改革好年华
社会和谐披彩霞
（未完待续。。）
